சுவிஸ் வங்கிகளில் கறுப்புப் பணத்தைப் பதுக்கியுள்ள வெளிநாட்டினரின் விவரங்களை அளிக்குமாறு பல்வேறு நாடுகள் சுவிஸ் வங்கிகளுக்கு நெருக்கடி கொடுத்து வரும் நிலையில், இந்த நெருக்கடிகளில் இருந்து தப்பிக்க இவ்வங்கிகள் புதிய உத்தியை பயன்படுத்தத் தொடங்கியுள்ளன.

அதாவது, தங்களின் மிக வேண்டப்பட்ட பெரிய வாடிக்கையாளர்களுக்கு அதிக மதிப்பு உள்ள 1000 பிராங் நோட்டுகளை வாங்கி அதனை ரகசியப் பெட்டிகளில் டெபாஸிட் செய்யுமாறு அவை கோரிக்கை விடுத்துள்ளன.

இந்தப் பெட்டிகள் சுவிஸ் வங்கிகளில் பாதுகாப்பாக இருக்கும். மேலும், பணம் என்று அல்லது தங்கம், வைரம், கலைப்பொருள்கள், ஓவியங்கள் இவற்றில் முதலீடு செய்து அவற்றை பத்திரமாகப் பாதுகாக்க அவை வாடிக்கையாளருக்கு ரகசிய அறிவுறுத்தல்களை வழங்கி வருகின்றன.

சுவிஸ் நாட்டின் மத்திய வங்கி (சுவிஸ் தேசிய வங்கி) தரவுகளின் படி 1000 பிராங் நோட்டுகள் சுவிஸ் நாட்டின் வங்கிப் பரிமாற்றங்களில் 60 சத இடத்தைப் பிடித்துள்ளது என்று தெரியவருகிறது. மேலும், கடந்த வருடத்தை விட இது 50 சதவீதம் அதிகரித்துள்ளது.