நிலநடுக்கத்தால் பாதிக்கப்பட்ட மக்களுக்கு உதவிகளை செய்வதற்காக, நால்வர் அடங்கிய சுவிஸ் நிபுணர் குழு விரைவில் ஈரான் செல்ல உள்ளது.

அப்போது ஈரான் அதிகாரிகளோடு கலந்து பேசி, செம்பிறை இயக்கத்தார் மூலமாக சுமார் ஆயிரம் பேருக்கு சுவிஸ் நிபுணர்கள் உதவிகளை வழங்குவர்.

சுவிஸ்ஸின் உதவிகளில் வெப்பம் தாக்காத கூடாரம், கம்பளி, கட்டப்பட்ட சமையலறை போன்றவை அடங்கும். வீடிழந்தவர்கள் இதனால் பயன்பெறுவர்.

இந்நிலையில் தங்கள் மீது பொருளாதாரத் தடை விதித்துள்ள அமெரிக்கா, ஜேர்மனி, ரஷ்யா, தைவான் போன்ற நாடுகளிடமிருந்து வரும் உதவிகளை மறுத்து விட்டதாகவும், கத்தார், பாகிஸ்தான், சுவிட்சர்லாந்து, அஸெர்பய்ஜான் போன்ற நாடுகளிலிருந்து வரும் உதவியை ஏற்றுக் கொள்வதாகவும் செம்பிறை இயக்கம் தெரிவித்துள்ளது.

ஈரானின் உள்துறை அமைச்சர் ஹசன் கடாமி கூறுகையில், அமெரிக்கா நல்லெண்ணத்துடன் எங்களுக்கு உதவும் என்று நாங்கள் நம்பவில்லை, எங்கள் மீது விதித்திருக்கும் பொருளாதாரத் தடையை நீக்குவதே எங்களுக்குப் பேருதவியாக அமையும் என்று தெரிவித்துள்ளார்.